dialogues for cast:

Meri zindagi mein ek aag lagakar tum bhi chain se nahi jee sakogi ... tumhari aatma til-til karke jalegi aur tumhe sukh ka ek saans bhi nahi milega

Bhagwan ne kitni achchi tarah tumko sajakar is duniya mein behja hai ... aankhen jaise jheel mein khile hue do kamal ... dekhti hai toh aakash mein indradhanush khil uthte hai ... sharamati hai toh kaliyon ka sar jhuk jaata hai

Charon taraf dekhte hai toh har baat mein khot aur milavat ... nal ka pani pejiye toh us mein dawai ki milavat hai, saans lijiye toh hawa mein millon ke dhuan ki milavat hai, agar khana khaiye toh roti ke aate mein mitti ki milavat hai ... charon taraf har baat mein jhoot hai ... dua mein, salaam mein, pyar mein, nafrat mein, gusse mein ... sab mein jhoot hai

Doobti hui kashti mein bhaagne waale kabhi sahil ka mooh tak nahi dekhte

Jeet inki nahi hogi, jeet janta ki hogi ... jeet is jhoot ki nahi hogi, jeet sachai ki hogi ... jeet in khooniyon ki nahi hogi, jeet hum begunahon ke khoon ki hogi

Mohabbat karne waalo ka bas itna hi hai afsana ... tadapna chupke chupke, aah bharna, ghutke marr jana

Mera dil bhi apka koi Hindustan nahi ... jispar aap hukumat kare

Main tumhari aankhon mein apni mohabbat ka ikraar dekhna chahta hoon

Duniya mein dilwale ka saath dena ... daulat waale ka nahi

Mohabbat humne maana zindagi barbad kar deti hai ... yeh kya kam hai ki marr jaane pe duniya yaad karti hai

Mohabbat joh darti ho woh mohabbat nahin ... ayyashi hai, gunaah hai

Taqdeerein badal jaati hai, zamana badal jaata hai, mulkon ki tarikh badal jaati hai, Shahenshah badal jaate hai ... magar is badalti hui duniya mein mohabbat jis insaan ka daaman thaam leti hai ... woh insaan nahi badalta

Kisi insaan ka yun khatam hona achcha nahi ... khatam toh honi chahiye uski burai, uska chotapan, uski khudgarzi

Hum toh sirf yeh chahte hai sethji ... ki hamara aur aapka amir ya garib ka rishta na rahe ... malik ya mazdoor ka rishta na rahe ... balki hum dono ke darmiyan ek insaan aur insaan ka rishta kayam ho

Rupaiya kya hai? ... mitti ki tarah ek bejaan aur bekaar cheez hai ... lekin jis tarah mitti mein mehnat ka beejh ugaye bagair paidawar nahi ho sakti ... ussi tarah rupaiya ke saath jab tak mehnat ka mel nahi hoga ... duniya mein kabhi koi tarakki nahi kar sakega

Insaan apne maa baap ke naam se nahi ... apne ghuno se achcha ya bura samjha jaata hai

Agar aaj hum sab aapas mein milkar aur apne kaam ko apna dharam samajhkar kare ... toh kal hamara desh bhi duniya ke sare mulkon ke aage apna sar ooncha karke khada ho sakega

Agar woh bechara ek din kaam par nahi jaata ... toh us bechare ke ghar mein chula nahi jalta ... aur jis din chula nahi jalta ... uska pet jalta hai, uski aatma jalti hai

Jis dhan ke liye aap duniya se dokha kar rahe hai, apne azeezon se, apne doston se dokha kar rahe hai, apne saathiyon se dokha kar rahe hai ... ussi dhan ke haathon aap khud bhi dokha khayenge

Tareef us khuda ki jisne jahan banaya ... unko haseen banakar mujhko jawan banaya

Jab amir ka dil kharab hota hai na ... toh gareeb ka dimaag kharab hota hai

Jiske dil mein daga aa jaati hai na ... uski aankhon mein daya kabhi nahi aati

Jab pet ki roti aur jeb ka paisa chin jaata hai na ... toh koi samajh wamajh nahi reh jaati hai aadmi ke paas

Dil ki awaaz dil se suni jaati hai ... kaano se nahi

Kaun kambakht hai joh bardaasht karne ke liye peeta hai ... main toh peeta hoon ki bas saans le sakun

Din ke waqt toh phool achche lagte hi hai ... magar chandni mein dekhiye toh yun lagta hai ... jaise nanne nanne shokh farishtey door ke dariya mein tairte phir rahe ho

Main kisi se nahi darta ... main zindagi se nahi darta, maut se nahi darta, andheron se nahi darta ... darta hoon toh sirf khoobsurati se

Jab dil se dil ki shaadi hoti hai na ... toh us mein na baraatiyon ki zaroorat hoti hai na kisi aur cheez ki ... us mein tamannao ki baraat nikalti hai aur khushiyon ki

Duniya mein asli shanti kisi ke sache pyar mein hi mil sakti hai ... uske bagair duniya jise shanti kehti hai, woh shanti ek thakan hai ... shakast ya maut ka doosra naam hai